Við erum frábærustu systkinin í bænum að sögn foreldra okkar en þau ljúga aldrei ;)
Tanja Kristín fæddist í Reykjavík þann 14. júní 2002 eftir 39v og 4d, sem gerir hana að tvíbura eins og pabba. Hún var rosaleg meðal stelpa, fæddist 3390g og 50cm, með ljóst en lítið hár og blá augu, það tók hana heilar 32klst. að komast í heiminn, en var hverrar mínútu virði. Hún var rosa dugleg að borða og stækkaði mjög, mjög hratt til að byrja með, núna er hún meðal stelpa aftur, þó sumir segja að hún sé reyndar svolítil lengjupía ;)
Mikael Aron fæddist líka í Reykjavík, þann 30. september 2006 eftir 40v og 4d sem gerir hann að vog, ansi þarft merki fyrir þetta heimili ;) Hann var líka í rosa flottri stærð eða 3675g og 52cm, með dökkt fiður á kollinum og tók hann aðeins 4klst. að komast i heiminn! Mikael fór að brosa 2ja vikna og hefur brosið varla farið af honum. Hann er s.s. alveg jafn yndislegur og systir sín og bera þau systkin mikinn svip af hvoru öðru.
Hilmir Hrafn fæddist líka í Hreiðrinu í Reykjavík, þann 4. janúar 2011 eftir 40v og 5d og er lítil steingeit sem valdi sér annað ár en hann átti að koma á. Hann var næstum alveg jafn þungur og stóri bróðir, eða 3670g og 50cm. Hann var líka með dökkt fiður á kollinum og tók hann tæpar 5klst. að mæta á svæðið. Litli ber mikinn svip af systkinum sínum og erum við öll spennt að kynnast þessari nýjustu viðbót í fjölskyldunni.
Mamma okkar og pabbi heita Árni og Selma og eru þau heppnust í heimi að eiga þennan fallega hóp :)
Tvíburarnir
21. maí - 21. júní
Óþolinmótt eftir að hefja leikinn er líklegt að tvíburabarnið hafi sparkað duglega í móðurkviði. Tvíburabörn eru líkleg til að byrja snemma að tala og þau segja sína skoðun frá byrjun. Þau eru mjög forvitin í eðli sínu og þurfa því alltaf að hafa eitthvað fyrir stafni. Þau eiga mjög erfitt með að sitja kyrr og eiga mjög erfitt með að þegja. Athyglin beinist stöðugt að nýjum viðfangsefnum en áhuginn hverfur oft mjög fljótt. Tvíburarnir þurfa mikla örvun og hyggilegt er að leikföng þeirra séu margvísleg og vitsmunalega þroskandi, svo sem púsluspil og þrautir af ýmsu tagi. Því fyrr sem tvíburabarnið kemst í hóp annarra barna því betra því tvíburarnir elska félagslíf enda hafa þeir mikla samskiptahæfileika. Líf og fjör er tvíburum að skapi. Yfirleitt er tvíburinn bráðþroska vitsmunalega og því nauðsynlegt að sinna þessum þætti í uppeldinu með því að reyna að svara t.d. spurningum hans (þær eru reyndar oft ansi margar) og ræða við hann. Litlir tvíburar eru oft stríðnir og hrekkjóttir en það ber ekki að taka of alvarlega því yfirleitt er meiningin ekki slæm. Hann grípur oft til prakkarastrika til að hrista upp í umhverfinu því hann hefur ríka þörf fyrir tilbreytingu.
Vogin
23. september - 23. október
Börn í vogarmerkinu eru oft glaðleg og broshýr og eru oftar en ekki börnin sem fá bros frá hinum sem bíða á biðstofu læknisins. Þau eru sjarmerandi og heilla aðra upp úr skónum. Félagslyndi einkennir vogina frá fyrstu tíð og litla vogin elskar að hafa margt fólk í kringum sig. Vogarbarn sem þarf að búa við einangrun getur orðið geðstirt, innhverft og óöruggt en þegar allt leikur í lyndi er það opið og hresst. Vogin á mjög erfitt með að gera upp hug sinn og virðist oft hafa lítinn viljastyrk. Þess vegna er mikilvægt að foreldrar hjálpi voginni að rækta með sér sjálfstæði og ákveðni meðal annars með því að fela henni ákveðin verkefni sem reyna á ákvarðanatöku. Líklegt er að Vogin spyrji álits og því er hægt að svara með því að spyrja: “Hvað finnst þér?” Síðan þarf að gefa henni næði til að vega og meta hlutina áður en hún tekur ákvörðun. Vogin er listræn í eðli sínu og mikilvægt að hlúa að þeim eiginleikum og skapa henni aðstöðu til að þroska listræna hæfileika sína.
Steingeitin
22. desember - 19. janúar
Steingeitin er alvarlegasta stjörnumerkið og oft er sagt að hún fæðist gömul og verði yngri eftir því sem árin færist yfir. Steingeitin er vel skipulögð og er ung að árum farin að taka þátt í rekstri heimilisins. Hún á stundum erfitt með að hafa gaman af lífinu og ekki er ólíklegt að barnið þitt velji frekar að raða fötunum sínum í skápinn en að fara út að leika. Mikilvægt er að foreldrar kenni börnum sínum að það er í lagi að slaka á og leika sér og að fullkomnun er ekki einungis ómöguleg heldur einnig mjög ópraktísk. Steingeitin er haldin fullkomnunaráráttu og óttast fátt meira en að missa sjálfsstjórn og þar með tök á tilverunni. Hún verður mjög óörugg ef hún hefur ekki gamalgrónar reglur og hefðir til að styðjast við og ef þær eru ekki til staðar er hún fljót að búa til reglur sjálf. Börn í steingeitinni eru mjög athugul, skynsöm og metnaðargjörn og dæmigerðar geitur vita allra merkja fyrst hvað þær ætla sér í lífinu. Mikilvægt er að kenna steingeitinni að tjá tilfinningar sínar, slaka á og sjá bjartari hliðar tilverunnar og ekki síst að ýta undir skopskyn hennar.
